插畫：thank.kiu.very.much

大家好，我係一位妓女，姐係你地口中所講嘅「雞」。我唔介意你地咁叫我，因為我都知道自己其實冇咩好值得人鐘意，冇靈魂冇自由意志，淨係識出賣自己肉體去換取金錢。不過我自問都幾靚，身材都幾好，係亞洲身型黎講真係算係咁，啲人有時仲讚我做「東方之珠」。

我嘅生世其實有小小複雜，上幾代因為家道中落嘅關係，曾呀爺好窮又弱。但佢好鐘意食煙，食到上曬癮個隻，之後有次同人起左次爭執（對方好似係鬼佬黎），後尾仲打埋交，我曾呀爺咁廢當然唔夠打，最尾佢認衰仔，話可以賣左佢其中一條血脈比個個鬼佬商人當係賠償咁話。就係咁，我個條血脈嘅人就咁比人放棄左，有啲就永久過繼比個商人，有啲就99年後先會同返曾呀爺個家族一齊。

起初嘅時候，我個條血脈嘅人都幾灰，曾呀爺竟然就咁塞左我地比人，但後來我地慢慢發現原呢個外國商人對我地呢條血脈都唔錯，仲對我地供書教學，當然間中都會有啲小爭執小風波，但總體黎講都叫融洽相處，畢竟個鬼佬都係文明人。後來，我地條血脈嘅人憑住拼搏嘅獅子山精神，打出一遍天，睇住80/90年代嘅風光，再對比當年曾呀爺另一條血脈嘅遠房親戚（好落後，又唔文明，啲家長仲好專制暴力控制啲疏堂堂哥/姐），覺得自己真係好好彩，而有咁嘅生活，唔多唔少都要感謝呢位外商，正所謂「生娘不及養娘大」，而後來聽返原來個位商人係英國人。

眨下眼，好快到左99年期限，即係1997年，原本話左過繼嘅血脈到最後都一齊跟大隊返左去我曾呀爺個家族到生活，個邊個疏堂呀爺笑笑口咁話會保證我地50年不變，我其實真係唔係幾想返去，但無奈我上一輩都冇咩出過聲反對同爭取，可能佢地諗住50年後佢地都唔係到，所以冇咩所謂咁啦。就係咁，我就正式返返去同個一族人住，成為左我一生嘅轉捩點。

頭幾年一齊住，生活相處上都尚算正常，都叫以禮相待，當時其實我係仲做緊dancer，仲未做「雞」，但97年之後我自己經歷左幾次大風浪，03年個陣我仲病得好犀利，醫生話隻病叫沙士（正名叫非典型肺炎）。後來發現原來病毒源頭係疏堂呀爺個到啲親戚食野味傳返來，搞到死左好多人。就係咁，我都元氣大傷，跳唔到舞，而個時呀爺就介紹左份工叫我去佢個到做，無錯，就係做「雞」...

當然，呀爺唔係直接同我講係做雞，佢哄我話只係接下佢啲客，等佢啲客人落黎玩下食下野購下物（咩自由行），我只需要賣下笑服務下就可以，話唔想浪費左我咁靚一個女仔，佢又再次承諾我，話比我自己管理自己啲工作，講左句咩「高度自治」，絕對唔會逼我做啲我唔想做嘅事。佢個offer當時我覺得唔錯丫，我當時又真係急需要一份工作，咁唯有接左黎做先，諗住試下。

有關故事。。。

【影片】「土家」幹事瑞玲、阿彬 | 以發展之名被連根拔起的「家」——離別在即，社區未完

做左一陣，份工嘅收入確實唔錯，都搵到幾多快錢，呀爺啲客次次都一窩瘋咁落曬黎，一出鋪面就多人到插針都插唔入。佢地一箱二箱行李箱咁拉黎拉去，大大聲叫好冇儀態又冇禮貌，成日都比佢地撞到隻腳。有一次，我竟然見到個客係間鋪到痾屎，咩料？！我咁大個都未見個有人會周街當眾痾屎仲好似冇野咁，我驚訝之際比另一個客吐左篤痰係我條裙到，我個下真係呆左，但我竟然冇咩出聲，因為鋪頭老細（呀爺委任，原本話可以自己選）叫我包容下要和諧，我心諗，啲客咁冇文化嘅，希望只係個別事件，畢竟啲客都幾有錢，忍耐下啦，啲人成日講，「人工包埋嘛」。

後來先發現，原來唔係個別事件，係呀爺個水客嘅文化就係咁低質，但為左生活賺錢，我都冇咩理。依家睇返，就係個時開始大家都只會默默接受一切，唔會反抗，只係諗住賺錢。

過左冇幾耐，呀爺啲客開始買到啲樓周圍都貴曬，幾年升左一倍，呀爺都唔知幾時開始起對我唔同左，開始毛手毛腳，有次我無意中仲聽到有個呀爺嘅客同佢個朋友講，「要不是呀爺，她這雞早就沒了」。

終於有一日，呀爺叫左我入佢房同佢傾野，佢鎖左門就對我摸黎摸去，我叫唔好，嘗試反抗。但佢同我講「1997年之後你一早就係我嘅人，你憑咩叫唔好？」我好嬲咁問佢「你又話保證我50年不變？！仲話咩「高度自治」，乜原來全部都係大話？！」到個一刻，我先猛然醒覺，其實呀爺一直都係利用緊我，佢一開始就係垂涎我嘅美色，想完全佔有控制我，呢段時間就係利用我幫佢家族搵客做生意賺錢，尤其係吸引啲外國人黎佢到。

正當我想反抗開門逃走嘅時候，佢就笑住同我講「你跑不掉的了，你從今只能依附著我。而且，這個鋪，我早已滲透一切，安插了我的人，那個叫文便聯的，就是我老子的人，哈哈哈哈！」從個日起，我就成為左呀爺嘅附屬品同埋性奴，佢想對我點就點，佢要我接咩客就咩客。所有以前確立嘅做人原則通通都冇曬（例如我曾經相信過嘅三權分立、人權自由、中英聯合聲明）。

如是者，過左一段時間，我慢慢見證住鋪頭入面好多不公義嘅事情浮面，好多官商鄉黑貪污勾結，員工交嘅員工基金比人用黎添置左好多無謂大白象工程，老細竟然係pantry飲水機隔離裝左個冇人想要嘅噴水池，原來個工程費要幾億，單工程交左比文便聯個親戚做，最仆街嘅係，啲水仲有鉛毒，但鋪頭個垃圾會比人控制曬竟然話唔洗調查。我一直睇左咁多忍左咁耐，覺得係呢個時候，我應該企出黎發聲。

係今年6月，我正式同呀爺同埋鋪頭個傀儡老細反枱，我同佢地大大聲講，「我地要民主自由！五大訴求，缺一不可！」

唔好意思，唔記得左同大家講我個名。

“我叫: 香港。”

閱讀作者的故事

閱讀更多故事

香港人的故事

【影片】Warren Stuart | 滑板教父——持之以恆以及滑板社群 (第一部分)

Warren Stuart是有份建立本地滑板圈子的香港人。在第一部分，Warren會談及他早期踩滑板的經歷、説明現時香港踩滑板的情況，以及給滑板新手的一些分享。

Gary Yau | 香港路牌與監獄體保育

Gary Yau，一位二十多歲的香港人，2016年創立「道路研究社」，花了幾年時間為香港僅餘的5、6百塊「監獄體」路牌作記敍，並透過出書、帖文，重現「監獄體」—— 香港特有的中英雙語路牌字體，分享道路相關知識。

Michelle Cheung | Paragon Tea Room：以茶奉有識之士

Michelle Cheung 是個經驗豐富的年輕商人，在咖啡店滿佈的溫哥華街頭引起熱話。剛迎來開店2周年的Paragon Tea Room是她的傾心之作，在Google擁有高達4.8顆星的評價，整個大溫哥華地區的人都慕名而來。在香港土生土長的Michelle其實從未想過在加拿大發展事業，而她正讓溫哥華的人接觸東方的茶文化，並希望有朝一日讓香港臉上有光。繼續讀下去，聽聽Michelle開設Paragon Tea Room的理念和故事吧。

【影片】「土家」幹事瑞玲、阿彬 | 以發展之名被連根拔起的「家」——離別在即，社區未完

土瓜灣故事館，簡稱「土家」，在2014年進駐土瓜灣鴻福街，現由「維修香港」與「社區文化關注」合力經營。「土家」是一個特別的社區公共空間，致力推動社區營造和記錄本「土」故事的工作，旨在進入社區、感受人文生活，慢慢凝聚一個屬於土瓜灣的「家」，並以本「土」故事館為大本營，希望建立家人一般互助的社區，守護這個盛載無數生活故事的地方。隨著土瓜灣重建計劃陸續展開，加上「土家」亦被納入重建範圍，一眾「土家」成員與街坊加快腳步，維繫與記錄漸漸消失的舊區文化與情懷。這次訪問，我們有幸請來瑞玲和阿彬這兩位成員，與我們分享「土家」的工作，以及面對重建、迫遷的感受。